وہ جو مجھ سے خفا نہیں ہوتا

وہ جو مجھ سے خفا نہیں ہوتا

میں بھی اس سے جدا نہیں ہوتا

کاش رہبر ملا نہیں ہوتا

میں سفر میں لٹا نہیں ہوتا

ہم تو کب کے بکھر گئے ہوتے

جو ترا آسرا نہیں ہوتا

ہم شرابی اگر نہیں بنتے

ایک بھی میکدہ نہیں ہوتا

جس جگہ قربتیں پنپ جائیں

اس جگہ فاصلہ نہیں ہوتا

آگ نفرت کی جس میں لگ جائے

پیڑ پھر وہ ہرا نہیں ہوتا

مندروں مسجدوں پے لڑتے ہو

کیا دلوں میں خدا نہیں ہوتا

مصلحت کچھ تو ہے ہلالؔ اس میں

زلزلہ یوں بپا نہیں ہوتا