wo jo sab kuchh hai use dur biTha rakkha hai

vo jo sab kuchh hai use duur biThā rakkhā hai

ḳhvāhisheñ haiñ jinheñ ma.abūd banā rakkhā hai

kuchh to hai tīrgī-e-dil meñ ujāle ke liye

tū nahīñ hai tirī yādoñ ko bulā rakkhā hai

har koī apne hī partav meñ hai sargarm-e-safar

maiñ ne māhaul ko ā.īna dikhā rakkhā hai

us kā bātin bhī hai ḳhurshīd-e-qayāmat kī tarah

ye jo ik taaq meñ chhoTā sā diyā rakkhā hai

ek lahza mirī tanhā.ī meñ aa kar dekho

maiñ ne zindāñ meñ bharā shahr basā rakkhā hai

sar-e-darbār jo pūchho to mirā jurm hai ye

maiñ ne kyoñ shahr meñ āñkhoñ ko khulā rakkhā hai

kabhī do bol mohabbat ke bhī ai jān-e-'safī'

jab bhī dekho tire hoñToñ pe lagā rakkhā hai

wo jo sab kuchh hai use dur biTha rakkha hai

KHwahishen hain jinhen mabud bana rakkha hai

kuchh to hai tirgi-e-dil mein ujale ke liye

tu nahin hai teri yaadon ko bula rakkha hai

har koi apne hi partaw mein hai sargarm-e-safar

main ne mahaul ko aaina dikha rakkha hai

us ka baatin bhi hai KHurshid-e-qayamat ki tarah

ye jo ek taq mein chhoTa sa diya rakkha hai

ek lahza meri tanhai mein aa kar dekho

main ne zindan mein bhara shahr basa rakkha hai

sar-e-darbar jo puchho to mera jurm hai ye

main ne kyon shahr mein aankhon ko khula rakkha hai

kabhi do bol mohabbat ke bhi ai jaan-e-'safi'

jab bhi dekho tere honTon pe laga rakkha hai