wo jo sabhi KHudaon ka ek hai KHuda mere aziz

vo jo sabhī ḳhudāoñ kā ik hai ḳhudā mire 'azīz

tum ko mile to bhejnā us kā pata mire 'azīz

us ne ḳhush-āmdīd agar tum ko nahīñ kahā to kyā

saikḌoñ minnatoñ ke baa'd dar to khulā mire 'azīz

lahroñ ne jhūm-jhūm kar chheḌā batoñ ke ġhol ko

nahr ke ās-pās thī aisī havā mire 'azīz

ye to baqā kī jang thī is ko to jītnā hī thā

tum ne sipar hī Daal dī kyā ye kiyā mire 'azīz

ek qadīm shaam ko raqs kiyā pahan ke maiñ

hijr meñ kaam aa ga.ī ye bhī qabā mire 'azīz

jā.iye chhūT dī ga.ī aap ko qatl-e-'ām kī

aap haiñ ‘urf-e-‘ām meñ rāh-numā mire 'azīz

wo jo sabhi KHudaon ka ek hai KHuda mere 'aziz

tum ko mile to bhejna us ka pata mere 'aziz

us ne KHush-amdid agar tum ko nahin kaha to kya

saikDon minnaton ke ba'd dar to khula mere 'aziz

lahron ne jhum-jhum kar chheDa baton ke ghol ko

nahr ke aas-pas thi aisi hawa mere 'aziz

ye to baqa ki jang thi is ko to jitna hi tha

tum ne sipar hi Dal di kya ye kiya mere 'aziz

ek qadim sham ko raqs kiya pahan ke main

hijr mein kaam aa gai ye bhi qaba mere 'aziz

jaiye chhuT di gai aap ko qatl-e-'am ki

aap hain ‘urf-e-‘am mein rah-numa mere 'aziz