wo kafir aashna na-ashna yun bhi hai aur yun bhi

vo kāfir āshnā nā-āshnā yuuñ bhī hai aur yuuñ bhī

hamārī ibtidā tā intihā yuuñ bhī hai aur yuuñ bhī

ta'ajjub kyā agar rasm-e-vafā yuuñ bhī hai aur yuuñ bhī

ki husn o ishq kā har mas.ala yuuñ bhī hai aur yuuñ bhī

kahīñ zarra kahīñ sahrā kahīñ qatra kahīñ dariyā

mohabbat aur us kā silsila yuuñ bhī hai aur yuuñ bhī

vo mujh se pūchhte haiñ ek maqsad merī hastī kā

batā.ūñ kyā ki merā mudda.ā yuuñ bhī hai aur yuuñ bhī

ham un se kyā kaheñ vo jāneñ un kī maslahat jaane

hamārā hāl-e-dil to barmalā yuuñ bhī hai aur yuuñ bhī

na pā lenā tirā āsāñ na kho denā tirā mumkin

musībat meñ ye jān-e-mubtalā yuuñ bhī hai aur yuuñ bhī

lagā de aag o barq-e-tajallī dekhtī kyā hai

nigāh-e-shauq zālim nā-rasā yuuñ bhī hai aur yuuñ bhī

ilāhī kis tarah aql o junūñ ko ek jā kar luuñ

ki manshā-e-nigāh-e-ishva-zā yuuñ bhī hai aur yuuñ bhī

'majāzī' se 'jigar' kah do are o aql ke dushman

muqir ho yā koī munkir ḳhudā yuuñ bhī hai aur yuuñ bhī

wo kafir aashna na-ashna yun bhi hai aur yun bhi

hamari ibtida ta intiha yun bhi hai aur yun bhi

ta'ajjub kya agar rasm-e-wafa yun bhi hai aur yun bhi

ki husn o ishq ka har masala yun bhi hai aur yun bhi

kahin zarra kahin sahra kahin qatra kahin dariya

mohabbat aur us ka silsila yun bhi hai aur yun bhi

wo mujh se puchhte hain ek maqsad meri hasti ka

bataun kya ki mera muddaa yun bhi hai aur yun bhi

hum un se kya kahen wo jaanen un ki maslahat jaane

hamara haal-e-dil to barmala yun bhi hai aur yun bhi

na pa lena tera aasan na kho dena tera mumkin

musibat mein ye jaan-e-mubtala yun bhi hai aur yun bhi

laga de aag o barq-e-tajalli dekhti kya hai

nigah-e-shauq zalim na-rasa yun bhi hai aur yun bhi

ilahi kis tarah aql o junun ko ek ja kar lun

ki mansha-e-nigah-e-ishwa-za yun bhi hai aur yun bhi

'majazi' se 'jigar' kah do are o aql ke dushman

muqir ho ya koi munkir KHuda yun bhi hai aur yun bhi