wo kahte hain aao meri anjuman mein magar main wahan ab nahin jaane wala

vo kahte haiñ aao mirī anjuman meñ magar maiñ vahāñ ab nahīñ jaane vaalā

ki aksar bulāyā bulā kar biThāyā biThā kar uThāyā uThā kar nikālā

nashāt-o-alam ke safed-o-siyah ne hamārī nigāhoñ ko hairat meñ Daalā

idhar raushnī hai udhar tīrgī hai kahīñ hai añdherā kahīñ hai ujālā

mirā dard pūchhā mirā haal dekhā mire dil kā armān tum ne nikālā

ḳhudā aur bhī de ziyāda marātib sivā aur is se bhī ho bol-bālā

paḌī niiv aapas meñ go dostī kī magar dostī kis tarah nibh sakegī

use hai nazākat mujhe hai naqāhat na vo aane vaalā na maiñ jaane vaalā

shivāle kī jānib qadam kyuuñ baḌhā.ūñ nazar kis liye sū-e-masjid uThā.ūñ

idhar kah rahā hai udhar sun rahā hai koī kahne vaalā koī sunñe vaalā

hamīñ par huiiñ kyā hazāroñ jafā.eñ hazāroñ par aa.iiñ hazāroñ balā.eñ

zamāne meñ koī sañbhalne na paayā kisī shoḳh ne hosh jab se sambhālā

vo aa.e the pahlū meñ behosh thā maiñ huī hogī dil par bahut kuchh navāzish

magar kyā ḳhabar mujh ko allāh jaane tamannā nikālī ki kāñTā nikālā

hazāroñ balā-nosh idhar bhī udhar bhī milī itnī fursat kahāñ mai-kade meñ

rahā kaam piine pilāne se sab ko na dhoī surāhī na sāġhar khañgālā

mohabbat ke jogī sitam ke birogī vafā ke bhikārī jafā ke pujārī

jahāñ dekh paate haiñ jalva butoñ kā bichhāte haiñ apnā vahīñ mirg-chhālā

churā le gayā koī dil bhī jigar bhī uḌā le gayā koī sabr-o-sukūñ bhī

yaqīñ hai tamannā nikalte nikalte nikal jā.egā āshiqoñ kā divālā

vatan se nikal kar akele chale the magar ḳhush-yaqīnī ke qurbān jaa.eñ

milā dasht-e-ġhurbat meñ ik ik qadam par hameñ ik na ik jān-pahchān vaalā

fuġhāñ kī bhī imdād hāsil karūñ maiñ mohabbat ko bhī kuchh tavajjoh dilā.ūñ

bharam jazb-e-dil kā nikalne na paa.e nikal aa.e parde se vo parde vaalā

ġhazab Dhā ga.iiñ sīdhī-sādī adā.eñ sitam kar ga.iiñ tirchhī bāñkī nigāheñ

yahī shor uTThā jidhar se vo guzre mujhe maar Daalā mujhe maar Daalā

idhar tuur par ġhash meñ muusā paḌe haiñ udhar hātif-e-ġhaib ye kah rahā hai

zarā kholiye aap āñkheñ to apnī qarīb aa gayā dekhiye duur vaalā

ye matlab thā armān us ke na nikleñ jo taḌpeñ to kuchh aur pechīdgī ho

mire ḳhāna-e-dil meñ ranj-o-alam ne tanā har taraf ḳhuub makḌī kā jaalā

tumhārā sanā-ḳhvāñ tumhārā duā-go tumhārā fidā.ī tumhārā salāmī

ye kyā kah diyā us ne vāqif nahīñ ham vahī haañ vahī 'nūh' tūfān vaalā

wo kahte hain aao meri anjuman mein magar main wahan ab nahin jaane wala

ki aksar bulaya bula kar biThaya biTha kar uThaya uTha kar nikala

nashat-o-alam ke safed-o-siyah ne hamari nigahon ko hairat mein Dala

idhar raushni hai udhar tirgi hai kahin hai andhera kahin hai ujala

mera dard puchha mera haal dekha mere dil ka arman tum ne nikala

KHuda aur bhi de ziyaada maraatib siwa aur is se bhi ho bol-baala

paDi niw aapas mein go dosti ki magar dosti kis tarah nibh sakegi

use hai nazakat mujhe hai naqahat na wo aane wala na main jaane wala

shiwale ki jaanib qadam kyun baDhaun nazar kis liye su-e-masjid uThaun

idhar kah raha hai udhar sun raha hai koi kahne wala koi sunne wala

hamin par huin kya hazaron jafaen hazaron par aain hazaron balaen

zamane mein koi sanbhalne na paya kisi shoKH ne hosh jab se sambhaala

wo aae the pahlu mein behosh tha main hui hogi dil par bahut kuchh nawazish

magar kya KHabar mujh ko allah jaane tamanna nikali ki kanTa nikala

hazaron bala-nosh idhar bhi udhar bhi mili itni fursat kahan mai-kade mein

raha kaam pine pilane se sab ko na dhoi surahi na saghar khangala

mohabbat ke jogi sitam ke birogi wafa ke bhikari jafa ke pujari

jahan dekh pate hain jalwa buton ka bichhate hain apna wahin mirg-chhaala

chura le gaya koi dil bhi jigar bhi uDa le gaya koi sabr-o-sukun bhi

yaqin hai tamanna nikalte nikalte nikal jaega aashiqon ka diwala

watan se nikal kar akele chale the magar KHush-yaqini ke qurban jaen

mila dasht-e-ghurbat mein ek ek qadam par hamein ek na ek jaan-pahchan wala

fughan ki bhi imdad hasil karun main mohabbat ko bhi kuchh tawajjoh dilaun

bharam jazb-e-dil ka nikalne na pae nikal aae parde se wo parde wala

ghazab Dha gain sidhi-sadi adaen sitam kar gain tirchhi banki nigahen

yahi shor uTTha jidhar se wo guzre mujhe mar Dala mujhe mar Dala

idhar tur par ghash mein musa paDe hain udhar hatif-e-ghaib ye kah raha hai

zara kholiye aap aankhen to apni qarib aa gaya dekhiye dur wala

ye matlab tha arman us ke na niklen jo taDpen to kuchh aur pechidgi ho

mere KHana-e-dil mein ranj-o-alam ne tana har taraf KHub makDi ka jala

tumhaara sana-KHwan tumhaara dua-go tumhaara fidai tumhaara salami

ye kya kah diya us ne waqif nahin hum wahi han wahi 'nuh' tufan wala