وہ کون ہے جو گلی میں کب سے سسک رہا ہے بلا کے لاؤ

وہ کون ہے جو گلی میں کب سے سسک رہا ہے بلا کے لاؤ

پکارتا بھی نہیں کسی کو جھجھک رہا ہے بلا کے لاؤ

وہ شہر بھر کا چہیتا پاگل وہ ہنستے رہنا ہے جس کی عادت

وہ آئنے کو رکھے مقابل بلک رہا ہے بلا کے لاؤ

وہ لڑکا جس کی خموش آنکھوں میں راز کتنے چھپے ہوئے ہیں

جنوں میں کیا کیا عجیب کلمات بک رہا ہے بلا کے لاؤ

وہ در حقیقت ہے شاہزادہ جو اک پری رو پہ مر مٹا ہے

فقیر کا بھیس لے کے ایدھر بھٹک رہا ہے بلا کے لاؤ

وہ ایک غنچۂ گل تھا پہلے ہوا ہے کیا اس کے ساتھ وہ جو

اب ایک آتش کدے کے جیسا دھدھک رہا ہے بلا کے لاؤ