wo KHud milne nahin aaya to uske ghar gaya main

vo ḳhud milne nahīñ aayā to us ke ghar gayā maiñ

hadeñ mā'lūm thiiñ lekin tajāvuz kar gayā maiñ

hisāb-e-roz-o-shab karnā nahīñ āsān pyāre

hisāb-e-roz-o-shab karte hue to mar gayā maiñ

mujhe har ek vīrānī sunātī hai kahānī

jahāñ koī nahīñ jaatā vahīñ aksar gayā maiñ

añdherā rāste meñ duur tak phailā huā thā

nahīñ mā'lūm kitnī duur be-manzar gayā maiñ

mohabbat se zarūrat kuchh ziyāda khīñchtī hai

use ghar par akelā chhoḌ kar daftar gayā maiñ

abhī tak to hadeñ shahr-e-junūñ kī tai nahīñ haiñ

kahīñ bāhar na rah jā.ūñ agar andar gayā maiñ

mire chāroñ taraf nafrat kā pahra lag chukā thā

magar phir bhī kisī sūrat mohabbat kar gayā maiñ

na kar tanqīd mere 'ishq ke tanhā safar par

tujhe mā'lūm hai kis ke ishāre par gayā maiñ

ḳhayāl aaya nahīñ kuchh bhī mire bas meñ nahīñ hai

du'ā māñgī to 'āsim' bebasī se Dar gayā maiñ

wo KHud milne nahin aaya to us ke ghar gaya main

haden ma'lum thin lekin tajawuz kar gaya main

hisab-e-roz-o-shab karna nahin aasan pyare

hisab-e-roz-o-shab karte hue to mar gaya main

mujhe har ek virani sunati hai kahani

jahan koi nahin jata wahin aksar gaya main

andhera raste mein dur tak phaila hua tha

nahin ma'lum kitni dur be-manzar gaya main

mohabbat se zarurat kuchh ziyaada khinchti hai

use ghar par akela chhoD kar daftar gaya main

abhi tak to haden shahr-e-junun ki tai nahin hain

kahin bahar na rah jaun agar andar gaya main

mere chaaron taraf nafrat ka pahra lag chuka tha

magar phir bhi kisi surat mohabbat kar gaya main

na kar tanqid mere 'ishq ke tanha safar par

tujhe ma'lum hai kis ke ishaare par gaya main

KHayal aaya nahin kuchh bhi mere bas mein nahin hai

du'a mangi to 'asim' bebasi se Dar gaya main