wo KHush-andaz-o-KHush-atwar kahin milte hain

vo ḳhush-andāz-o-ḳhush-atvār kahīñ milte haiñ

zindagī tere parastār kahīñ milte haiñ

jaise ik moḌ pe milte haiñ kahīñ shām-o-sahar

us tarah bhī dil-o-dildār kahīñ milte haiñ

jaisī āñkheñ haiñ tirī aur ye dil hai jaisā

aise sharminda-e-iz.hār kahīñ milte haiñ

ek dīvāna-e-duniyā kā thā jannat se savāl

kyā yahāñ dirham-o-dīnār kahīñ milte haiñ

kisī bāzār meñ miltī hai junūñ naam kī shai

hausle 'ishq ke tayyār kahīñ milte haiñ

DhūñD le DhūñD sake koī agar rāh-e-farār

ek jānib dar-o-dīvār kahīñ milte haiñ

tum se milnā bhī hai milnā bhī nahīñ hai tum se

aao tum se sar-e-bāzār kahīñ milte haiñ

yā tirī bazm meñ haiñ yā mire dil meñ 'ajmal'

zindagī ke agar āsār kahīñ milte haiñ

wo KHush-andaz-o-KHush-atwar kahin milte hain

zindagi tere parastar kahin milte hain

jaise ek moD pe milte hain kahin sham-o-sahar

us tarah bhi dil-o-dildar kahin milte hain

jaisi aankhen hain teri aur ye dil hai jaisa

aise sharminda-e-izhaar kahin milte hain

ek diwana-e-duniya ka tha jannat se sawal

kya yahan dirham-o-dinar kahin milte hain

kisi bazar mein milti hai junun nam ki shai

hausle 'ishq ke tayyar kahin milte hain

DhunD le DhunD sake koi agar rah-e-farar

ek jaanib dar-o-diwar kahin milte hain

tum se milna bhi hai milna bhi nahin hai tum se

aao tum se sar-e-bazar kahin milte hain

ya teri bazm mein hain ya mere dil mein 'ajmal'

zindagi ke agar aasar kahin milte hain