وہ کیا سمجھے نظر جس کی فقط سود و زیاں تک ہے

وہ کیا سمجھے نظر جس کی فقط سود و زیاں تک ہے

کہ یہ سودا محبت کا حساب دوستاں تک ہے

مرے نقد و نظر تک ہے مرے حسن بیاں تک ہے

تمہاری داستاں میں رنگ میری داستاں تک ہے

حرم سے بھی ہے آگے یا فقط کوئے بتاں تک ہے

خدا جانے مقام جستجوئے دل کہاں تک ہے

محبت ان لوازم پر قناعت کر نہیں سکتی

کہ ان سجدوں کی منزل تیرے سنگ آستاں تک ہے

دلوں کا مضطرب جذبہ نظر کا منفعل شکوہ

مری حیرت ترا عشوہ کنایوں کی زباں تک ہے

یہ کس شدت کی جنبش ہے حجابات تجلی میں

کہ اک میلان بیتابی زمیں سے آسماں تک ہے

ملے گی روشنی احساںؔ نظر کی گرد تو پوچھو

کہ یہ سارا اندھیرا بس غبار کارواں تک ہے