وہ لفظ تیر بنا کر کمان بھرتا ہے

وہ لفظ تیر بنا کر کمان بھرتا ہے

جو کان کھینچنے والوں کے کان بھرتا ہے

انہی کی آنکھ میں مرتا ہے ڈوب کر دریا

کہ جن کی پیاس کا پانی جہان بھرتا ہے

مرض علاج سے بڑھتا گیا تو ہم پہ کھلا

طبیب عشق تو اپنی دکان بھرتا ہے

ستارے بنتے ہیں جب شام توڑ دے سورج

یہیں سے جھولی ترا آسمان بھرتا ہے

کوئی بتائے اسے حال تاکہ لوٹ آئے

کہ تیرا قرض ترا خاندان بھرتا ہے

خلا اگلتی ہے سیارے تیری راہوں میں

تو حوصلے سے جو خالی اڑان بھرتا ہے

فلک سے کچھ بھی اترتا نہیں یوں ہی شاہدؔ

زمین زاد زمیں کا لگان بھرتا ہے