wo mahakti palkon ki oT se koi tara chamka tha raat mein

vo mahaktī palkoñ kī oT se koī taarā chamkā thā raat meñ

mirī band muTThī na kholiye vahī koh-e-nūr hai haat meñ

maiñ tamām taare uThā uThā ke ġharīb logoñ meñ baañT duuñ

kabhī ek raat vo āsmān kā nizām deñ mire haat meñ

abhī shaam tak mire baaġh meñ kahīñ koī phuul khilā na thā

mujhe ḳhushbuoñ meñ basā gayā tirā pyaar ek hī raat meñ

tire saath itne bahut se din to palak jhapakte guzar ga.e

huī shaam khel hī khel meñ ga.ī raat baat hī baat meñ

koī ishq hai ki akelā ret kī shawl oḌh ke chal diyā

kabhī bāl-bachchoñ ke saath aa ye paḌāv lagtā hai raat meñ

kabhī saat rangoñ kā phuul huuñ kabhī dhuup huuñ kabhī dhuul huuñ

maiñ tamām kapḌe badal chukā tire mausamoñ kī barāt meñ

wo mahakti palkon ki oT se koi tara chamka tha raat mein

meri band muTThi na kholiye wahi koh-e-nur hai hat mein

main tamam tare uTha uTha ke gharib logon mein banT dun

kabhi ek raat wo aasman ka nizam den mere hat mein

abhi sham tak mere bagh mein kahin koi phul khila na tha

mujhe KHushbuon mein basa gaya tera pyar ek hi raat mein

tere sath itne bahut se din to palak jhapakte guzar gae

hui sham khel hi khel mein gai raat baat hi baat mein

koi ishq hai ki akela ret ki shawl oDh ke chal diya

kabhi baal-bachchon ke sath aa ye paDaw lagta hai raat mein

kabhi sat rangon ka phul hun kabhi dhup hun kabhi dhul hun

main tamam kapDe badal chuka tere mausamon ki baraat mein