wo mere samne ho ke bhi mujhko yaksar dikhai nahin de raha

vo mire sāmne ho ke bhī mujh ko yaksar dikhā.ī nahīñ de rahā

is kā matlab yahī hai ki maiñ us ko apnī rasā.ī nahīñ de rahā

ik ġhubār-e-sadā uḌ rahā hai fazā meñ samā'at kī hairān huuñ

sab samajhtā hai dil aur kahtā hai kuchh bhī sunā.ī nahīñ de rahā

maiñ to uktā gayā vasl kī lazzatoñ se ki yak-kaifiyat zahr hai

kab se huuñ multajī hijr kā vo hī mujh ko judā.ī nahīñ de rahā

āsmāñ jo tumhāre paroñ meñ hai simTā huā kab use khologe

yuuñ hī bekār meñ shor karnā hameñ vo rihā.ī nahīñ de rahā

‘āshiqāñ 'āshiqī kī rivāyat ko tum is qadar to na rusvā karo

kāmgāroñ ke jaise ye kyā rote ho vo kamā.ī nahīñ de rahā

wo mere samne ho ke bhi mujh ko yaksar dikhai nahin de raha

is ka matlab yahi hai ki main us ko apni rasai nahin de raha

ek ghubar-e-sada uD raha hai faza mein sama'at ki hairan hun

sab samajhta hai dil aur kahta hai kuchh bhi sunai nahin de raha

main to ukta gaya wasl ki lazzaton se ki yak-kaifiyat zahr hai

kab se hun multaji hijr ka wo hi mujh ko judai nahin de raha

aasman jo tumhaare paron mein hai simTa hua kab use khologe

yun hi bekar mein shor karna hamein wo rihai nahin de raha

‘ashiqan 'ashiqi ki riwayat ko tum is qadar to na ruswa karo

kaamgaron ke jaise ye kya rote ho wo kamai nahin de raha