وہ مرے سامنے ہو کے بھی مجھ کو یکسر دکھائی نہیں دے رہا

وہ مرے سامنے ہو کے بھی مجھ کو یکسر دکھائی نہیں دے رہا

اس کا مطلب یہی ہے کہ میں اس کو اپنی رسائی نہیں دے رہا

اک غبار صدا اڑ رہا ہے فضا میں سماعت کی حیران ہوں

سب سمجھتا ہے دل اور کہتا ہے کچھ بھی سنائی نہیں دے رہا

میں تو اکتا گیا وصل کی لذتوں سے کہ یک کیفیت زہر ہے

کب سے ہوں ملتجی ہجر کا وہ ہی مجھ کو جدائی نہیں دے رہا

آسماں جو تمہارے پروں میں ہے سمٹا ہوا کب اسے کھولو گے

یوں ہی بے کار میں شور کرنا ہمیں وہ رہائی نہیں دے رہا

عاشقاں عاشقی کی روایت کو تم اس قدر تو نہ رسوا کرو

کامگاروں کے جیسے یہ کیا روتے ہو وہ کمائی نہیں دے رہا