wo pari hi nahin kuchh ho ke kaDi mujhse laDi

vo parī hī nahīñ kuchh ho ke kaḌī mujh se laḌī

aañkh nargis se bhī do-chār ghaḌī mujh se laḌī

vāste tere mirā rañg-mahal hai dushman

terī ḳhātir to har ik chhoTī baḌī mujh se laḌī

jhaḌ lagā dī mirī āñkhoñ ne to lo aur suno

TukTukī bāñdh ke kyuuñ muñh kī jhaḌī mujh se laḌī

raat laḌ-bhiḌ vo jo chup ho rahī to un ke 'evaz

bolte the vo jo sone kī ghaḌī mujh se laḌī

baiThe baiThe kahīñ bulbul ko jo chheḌā maiñ ne

to nasīm us kī badal ho ke khaḌī mujh se laḌī

kaun sī huur yahāñ khelne chauthī aa.ī

bū-e-gul le ke jo phūloñ kī chhaḌī mujh se laḌī

ruuTh kar un kī galī meñ jo lagā tū 'inshā'

har ik us do laḌī motī kī laḌī mujh se laḌī

wo pari hi nahin kuchh ho ke kaDi mujh se laDi

aankh nargis se bhi do-chaar ghaDi mujh se laDi

waste tere mera rang-mahal hai dushman

teri KHatir to har ek chhoTi baDi mujh se laDi

jhaD laga di meri aankhon ne to lo aur suno

TukTuki bandh ke kyun munh ki jhaDi mujh se laDi

raat laD-bhiD wo jo chup ho rahi to un ke 'ewaz

bolte the wo jo sone ki ghaDi mujh se laDi

baiThe baiThe kahin bulbul ko jo chheDa main ne

to nasim us ki badal ho ke khaDi mujh se laDi

kaun si hur yahan khelne chauthi aai

bu-e-gul le ke jo phulon ki chhaDi mujh se laDi

ruTh kar un ki gali mein jo laga tu 'insha'

har ek us do laDi moti ki laDi mujh se laDi