wo raqs karne lagin hawaen wo badliyon ka payam aaya

vo raqs karne lagīñ havā.eñ vo badliyoñ kā payām aayā

ye kis ne bikhrā.īñ ruḳh pe zulfeñ ye kaun bālā-e-bām aayā

mujhe ḳhushī hai ki aaj merā junūñ bhī yuuñ mere kaam aayā

samajh ke dīvāna-e-mohabbat tumhāre hoñToñ pe naam aayā

mujhe surāhī se kyā ġharaz hai merā nasha asl meñ alag hai

idhar tumhārī nigāh uTThī udhar surūr-e-davām aayā

ye husn faanī hai merī jaañ ye javāniyoñ pe ġhurūr kaisā

jahāñ chaḌhā mehr-e-nīm-rozī usī jagah vaqt-e-shām aayā

chahaktī ye bulbuleñ ye gulchīñ chaman pe haq hai sabhī kā lekin

kisī ke hisse meñ phuul aa.e kisī ke hisse meñ daam aayā

diyā mujhe maut ne sambhālā lahad meñ bhī ho gayā ujālā

ye qabr par kis ne gul chaḌhā.e ye kaun māh-e-tamām aayā

na to faūlun na fā.elātun na bahr koī na koī taḳhtī

ye hai ināyat kisī kī 'shevan' tujhe shu.ūr-e-kalām aayā

wo raqs karne lagin hawaen wo badliyon ka payam aaya

ye kis ne bikhrain ruKH pe zulfen ye kaun baala-e-baam aaya

mujhe KHushi hai ki aaj mera junun bhi yun mere kaam aaya

samajh ke diwana-e-mohabbat tumhaare honTon pe nam aaya

mujhe surahi se kya gharaz hai mera nasha asl mein alag hai

idhar tumhaari nigah uTThi udhar surur-e-dawam aaya

ye husn fani hai meri jaan ye jawaniyon pe ghurur kaisa

jahan chaDha mehr-e-nim-rozi usi jagah waqt-e-sham aaya

chahakti ye bulbulen ye gulchin chaman pe haq hai sabhi ka lekin

kisi ke hisse mein phul aae kisi ke hisse mein dam aaya

diya mujhe maut ne sambhaala lahad mein bhi ho gaya ujala

ye qabr par kis ne gul chaDhae ye kaun mah-e-tamam aaya

na to faulun na faelatun na bahr koi na koi taKHti

ye hai inayat kisi ki 'shewan' tujhe shuur-e-kalam aaya