wujud apna bara-e-adam banata hun

vujūd apnā barā-e-'adam banātā huuñ

purāne ġham se nayā ek ġham banātā huuñ

ye dekhtī hī nahīñ bolne bhī lagtī hai

isī liye to maiñ tasvīr kam banātā huuñ

mire hunar se bahut canvas pareshāñ hai

maiñ jo bhī aañkh banātā huuñ nam banātā huuñ

banāne vaalā 'ajab huuñ ki ab zamīñ hī nahīñ

maiñ āsmān bhī zer-e-qadam banātā huuñ

mire 'alāva nahīñ hai koī harīf mirā

maiñ ḳhud ko taḳhta-e-mashq-e-sitam banātā huuñ

kisī kisī pe hī hotā huuñ munkashif 'ġhā.er'

mirā mizāj hai maiñ dost kam banātā huuñ

wujud apna bara-e-'adam banata hun

purane gham se naya ek gham banata hun

ye dekhti hi nahin bolne bhi lagti hai

isi liye to main taswir kam banata hun

mere hunar se bahut canwas pareshan hai

main jo bhi aankh banata hun nam banata hun

banane wala 'ajab hun ki ab zamin hi nahin

main aasman bhi zer-e-qadam banata hun

mere 'alawa nahin hai koi harif mera

main KHud ko taKHta-e-mashq-e-sitam banata hun

kisi kisi pe hi hota hun munkashif 'ghaer'

mera mizaj hai main dost kam banata hun