ya ilahi mujhko ye kya ho gaya

yā ilāhī mujh ko ye kyā ho gayā

dostī kā terī saudā ho gayā

dostī kyā ham-sarī kā dhyān hai

qaid se āzād itnā ho gayā

kaisī āzādī asīrī chiiz kyā

jab fanā rañg-e-tamannā ho gayā

jab tamannā aur Dar jaatā rahā

to har ik shai se mubarrā ho gayā

yuuñ mubarrā ho ga.ī jab koī zaat

band phir naġhma sifat kā ho gayā

jab huā ausāf se koī barī

aib kyūñkar us meñ paidā ho gayā

ḳhud-parastī is ko yā jo kuchh kaho

ab to ye aalam hamārā ho gayā

be-ḳhudī ne mahv-e-hairat kar diyā

aap meñ apnā tamāshā ho gayā

jis ko dekhā aap hī aayā nazar

rañg ab 'kaifī' ye apnā ho gayā

ya ilahi mujh ko ye kya ho gaya

dosti ka teri sauda ho gaya

dosti kya ham-sari ka dhyan hai

qaid se aazad itna ho gaya

kaisi aazadi asiri chiz kya

jab fana rang-e-tamanna ho gaya

jab tamanna aur Dar jata raha

to har ek shai se mubarra ho gaya

yun mubarra ho gai jab koi zat

band phir naghma sifat ka ho gaya

jab hua ausaf se koi bari

aib kyunkar us mein paida ho gaya

KHud-parasti is ko ya jo kuchh kaho

ab to ye aalam hamara ho gaya

be-KHudi ne mahw-e-hairat kar diya

aap mein apna tamasha ho gaya

jis ko dekha aap hi aaya nazar

rang ab 'kaifi' ye apna ho gaya