ya to falak se chand utar kar tair raha hai pani mein

yā to falak se chāñd utar kar tair rahā hai paanī meñ

yā phir us kā dilkash chehra 'aks huā hai paanī meñ

'ishq to kab kā motī ban kar tāj-e-vafā meñ saj bhī chukā

DhūñDne vāloñ ko samjhāo sirf ghaḌā hai paanī meñ

jābir machhlī tund bhañvar saffāk magarmachh gahrā.ī

sab mā'lūm thā phir bhī ham ne paañv rakhā hai paanī meñ

saañs kā lenā kyā mushkil hai jism hunar rakhtā ho agar

ḳhilqat-e-shahr-e-āb se pūchho kitnī havā hai paanī meñ

kyā maiñ koī jazīra huuñ yā āñkheñ haiñ sailāb-zada

mere gird kā har manzar kyoñ Duub gayā hai paanī meñ

jab dil ke tālāb meñ 'āsim' yaad ne kankar pheñkā hai

ik chehra tasvīr banā ik phuul khilā hai paanī meñ

ya to falak se chand utar kar tair raha hai pani mein

ya phir us ka dilkash chehra 'aks hua hai pani mein

'ishq to kab ka moti ban kar taj-e-wafa mein saj bhi chuka

DhunDne walon ko samjhao sirf ghaDa hai pani mein

jabir machhli tund bhanwar saffak magarmachh gahrai

sab ma'lum tha phir bhi hum ne panw rakha hai pani mein

sans ka lena kya mushkil hai jism hunar rakhta ho agar

KHilqat-e-shahr-e-ab se puchho kitni hawa hai pani mein

kya main koi jazira hun ya aankhen hain sailab-zada

mere gird ka har manzar kyon Dub gaya hai pani mein

jab dil ke talab mein 'asim' yaad ne kankar phenka hai

ek chehra taswir bana ek phul khila hai pani mein