یا تو فلک سے چاند اتر کر تیر رہا ہے پانی میں

یا تو فلک سے چاند اتر کر تیر رہا ہے پانی میں

یا پھر اس کا دل کش چہرہ عکس ہوا ہے پانی میں

عشق تو کب کا موتی بن کر تاج وفا میں سج بھی چکا

ڈھونڈنے والوں کو سمجھاؤ صرف گھڑا ہے پانی میں

جابر مچھلی تند بھنور سفاک مگرمچھ گہرائی

سب معلوم تھا پھر بھی ہم نے پاؤں رکھا ہے پانی میں

سانس کا لینا کیا مشکل ہے جسم ہنر رکھتا ہو اگر

خلقت شہر آب سے پوچھو کتنی ہوا ہے پانی میں

کیا میں کوئی جزیرہ ہوں یا آنکھیں ہیں سیلاب زدہ

میرے گرد کا ہر منظر کیوں ڈوب گیا ہے پانی میں

جب دل کے تالاب میں عاصمؔ یاد نے کنکر پھینکا ہے

اک چہرہ تصویر بنا اک پھول کھلا ہے پانی میں