yaad aa gaya wo shaKHs to yaad aae jaega

yaad aa gayā vo shaḳhs to yaad aa.e jā.egā

rulvā.e jā.egā hameñ taḌpā.e jā.egā

tā'bīr se kabhī to navāzegā āsmān

kab tak hamāre ḳhvāb-mahal Dhaa.e jā.egā

sar 'ishq kī muhim nahīñ hotī dimāġh se

jo sochtā rahegā vo ghabrā.e jā.egā

itnā bhī sabr-o-shukr kā qaa.il nahīñ ki dil

har kaifiyat meñ aap ke gun gaa.e jā.egā

aatā hai rahm nāseh-e-mushfiq ke haal par

be-chāra 'umr-bhar hameñ samjhā.e jā.egā

nazreñ haTā haTā ke na kyoñ guftugū kareñ

ham dekhe jā.eñge to vo sharmā.e jā.egā

thoḌī 'sha'ūr' aur chaḌhā le to har taraf

sāġhar nachā.e jā.egā chhalkā.e jā.egā

yaad aa gaya wo shaKHs to yaad aae jaega

rulwae jaega hamein taDpae jaega

ta'bir se kabhi to nawazega aasman

kab tak hamare KHwab-mahal Dhae jaega

sar 'ishq ki muhim nahin hoti dimagh se

jo sochta rahega wo ghabrae jaega

itna bhi sabr-o-shukr ka qail nahin ki dil

har kaifiyat mein aap ke gun gae jaega

aata hai rahm naseh-e-mushfiq ke haal par

be-chaara 'umr-bhar hamein samjhae jaega

nazren haTa haTa ke na kyon guftugu karen

hum dekhe jaenge to wo sharmae jaega

thoDi 'sha'ur' aur chaDha le to har taraf

saghar nachae jaega chhalkae jaega