یاد آ گیا وہ شخص تو یاد آئے جائے گا

یاد آ گیا وہ شخص تو یاد آئے جائے گا

رلوائے جائے گا ہمیں تڑپائے جائے گا

تعبیر سے کبھی تو نوازے گا آسمان

کب تک ہمارے خواب محل ڈھائے جائے گا

سر عشق کی مہم نہیں ہوتی دماغ سے

جو سوچتا رہے گا وہ گھبرائے جائے گا

اتنا بھی صبر و شکر کا قائل نہیں کہ دل

ہر کیفیت میں آپ کے گن گائے جائے گا

آتا ہے رحم ناصح مشفق کے حال پر

بے چارہ عمر بھر ہمیں سمجھائے جائے گا

نظریں ہٹا ہٹا کے نہ کیوں گفتگو کریں

ہم دیکھے جائیں گے تو وہ شرمائے جائے گا

تھوڑی شعورؔ اور چڑھا لے تو ہر طرف

ساغر نچائے جائے گا چھلکائے جائے گا