yaad hain we din tujhe hum kaise aawaron mein the

yaad haiñ ve din tujhe ham kaise āvāroñ meñ the

ḳhaar the har ābloñ meñ aable ḳhāroñ meñ the

ai gulābī mast phir muñh lag ke us ke is qadar

la.al-e-lab ke ek din ham bhī parastāroñ meñ the

lab talak bhī aa nahīñ sakte haiñ maare zo.af ke

aah fauj-e-ġham ke jo jaane havaldāroñ meñ the

sāmne kal ḳhush-nigāhoñ ke jo aayā mar gayā

dekhā Tuk kyā hī javāhar un kī tarvāroñ meñ the

mere us ke darmiyāñ harf aayā jab insāf kā

phir ga.e ik martaba jitne taraf-dāroñ meñ the

nāla-o-āh-o-fuġhāñ dard-o-alam soz-o-gudāz

aah kaise kaise 'joshish' apne ġham-ḳhvāroñ meñ the

yaad hain we din tujhe hum kaise aawaron mein the

KHar the har aablon mein aable KHaron mein the

ai gulabi mast phir munh lag ke us ke is qadar

lal-e-lab ke ek din hum bhi parastaron mein the

lab talak bhi aa nahin sakte hain mare zoaf ke

aah fauj-e-gham ke jo jaane hawaldaron mein the

samne kal KHush-nigahon ke jo aaya mar gaya

dekha Tuk kya hi jawahar un ki tarwaron mein the

mere us ke darmiyan harf aaya jab insaf ka

phir gae ek martaba jitne taraf-daron mein the

nala-o-ah-o-fughan dard-o-alam soz-o-gudaz

aah kaise kaise 'joshish' apne gham-KHwaron mein the