یاد کر کے تو گئے وقت کو روتا ہوگا

یاد کر کے تو گئے وقت کو روتا ہوگا

چاند جب جب ترے آنگن میں اترتا ہوگا

یوں ہی مرجھا سے گئے ہوں گے مہکتے گجرے

جانے والا نہ مگر لوٹ کے آیا ہوگا

جو مرا نام بھی لیتا تھا دعاؤں کی طرح

سوچتی ہوں مجھے کس طور سے بھولا ہوگا

چاند ہر گھر میں یہی ہوگا مگر اس کے سبب

ہنس پڑا ہوگا کوئی اور کوئی رویا ہوگا

کوئی گریہ بھی نہ محروم تمنا نہ کیا

حوصلہ وقت نے کیا کیا نہ سکھایا ہوگا

جب مرے ہاتھ تھے روئی ہوئی نم آنکھوں پر

اس نے جاتے ہوئے مڑ کر مجھے دیکھا ہوگا

مشک بار آئی ہے یادوں کے دریچے سے ہوا

کوئی گزرا ہوا لمحہ کہیں مہکا ہوگا