yaad ke darichon mein barishon ke manzar hain

yaad ke darīchoñ meñ bārishoñ ke manzar haiñ

kis nagar kī bāteñ haiñ kin rutoñ ke manzar haiñ

ajnabī dayāroñ meñ shauq-e-dīd le jaao

kuchh nahīñ to har jānib dilbaroñ ke manzar haiñ

umr ho ga.ī lekin ab bhī haiñ ta.āqub meñ

us galī se aage bhī titliyoñ ke manzar haiñ

dil kī nam zamīnoñ par chal rahe haiñ ham kab se

duur zard peḌoñ par āñdhiyoñ ke manzar haiñ

maiñ huuñ aur samundar hai pesh-e-sā.id-e-sīmīñ

dar-pas-e-ruḳh-e-zarrīñ parbatoñ ke manzar haiñ

husn-e-kam-qabā dariyā aur huā barahna-pā

naqsh aaj bhī dil par jañgaloñ ke manzar haiñ

kyā har ek jānib se chal ke ḳhud tak aayā huuñ

mere chār-sū 'jamshed' rāstoñ ke manzar haiñ

yaad ke darichon mein barishon ke manzar hain

kis nagar ki baaten hain kin ruton ke manzar hain

ajnabi dayaron mein shauq-e-did le jao

kuchh nahin to har jaanib dilbaron ke manzar hain

umr ho gai lekin ab bhi hain taaqub mein

us gali se aage bhi titliyon ke manzar hain

dil ki nam zaminon par chal rahe hain hum kab se

dur zard peDon par aandhiyon ke manzar hain

main hun aur samundar hai pesh-e-said-e-simin

dar-pas-e-ruKH-e-zarrin parbaton ke manzar hain

husn-e-kam-qaba dariya aur hua barahna-pa

naqsh aaj bhi dil par jangalon ke manzar hain

kya har ek jaanib se chal ke KHud tak aaya hun

mere chaar-su 'jamshed' raston ke manzar hain