yaad kya dast-e-hunar hai ki sanwarta gaya main

yaad kyā dast-e-hunar hai ki sañvartā gayā maiñ

us ko sochā to use yaad hī kartā gayā maiñ

is ko tahzīb-e-junūñ kahiye ki mujh se pahle

jaise bikhre haiñ sabhī log bikhartā gayā maiñ

naqsh kitne the ki ma.adūm hue silsila-vār

aur har naqsh ke pahle se ubhartā gayā maiñ

ek tasvīr banā.ī thī mukammal na huī

ek hī rañg lahū rañg thā bhartā gayā maiñ

harf-e-iqrār hī kahtā rahā be-ḳhaufī se

ya.anī inkār ke āshob se Dartā gayā maiñ

dāman-e-vaqt se sau harf-e-satā.ish bhī chune

aur ilzām sabhī vaqt pe dhartā gayā maiñ

apne andar ke talātum ne rakhā hai ābād

ḳhud hī iqrār kiyā ḳhud hī mukartā gayā maiñ

mujh meñ har lamha fuzūñ-tar huā andoh-e-jamāl

aur tasvīr ke mānind sañvartā gayā maiñ

har nafas baḌhtā gayā us kī tamannā kā ḳharosh

lamha lamha isī vahshat meñ nikhartā gayā maiñ

zindagī ku-e-malāmat hai koī kyā Thahre

apnī hī vaz.a kā maiñ huuñ so Thahartā gayā maiñ

yaad kya dast-e-hunar hai ki sanwarta gaya main

us ko socha to use yaad hi karta gaya main

is ko tahzib-e-junun kahiye ki mujh se pahle

jaise bikhre hain sabhi log bikharta gaya main

naqsh kitne the ki madum hue silsila-war

aur har naqsh ke pahle se ubharta gaya main

ek taswir banai thi mukammal na hui

ek hi rang lahu rang tha bharta gaya main

harf-e-iqrar hi kahta raha be-KHaufi se

yani inkar ke aashob se Darta gaya main

daman-e-waqt se sau harf-e-sataish bhi chune

aur ilzam sabhi waqt pe dharta gaya main

apne andar ke talatum ne rakha hai aabaad

KHud hi iqrar kiya KHud hi mukarta gaya main

mujh mein har lamha fuzun-tar hua andoh-e-jamal

aur taswir ke manind sanwarta gaya main

har nafas baDhta gaya us ki tamanna ka KHarosh

lamha lamha isi wahshat mein nikharta gaya main

zindagi ku-e-malamat hai koi kya Thahre

apni hi waza ka main hun so Thaharta gaya main