yaadgar-e-guzishtagan hain hum

yādgār-e-guzishtagāñ haiñ ham

ḳhuub dekhā to phir kahāñ haiñ ham

sham.a kī tarah bazm-e-gītī meñ

daaġh baiThe haiñ aur ravāñ haiñ ham

rahe jaate haiñ pīchhe yāroñ se

gard-e-dumbāl-e-kārvāñ haiñ ham

rakh na ḳhanjar ko haath se qātil

tere kushtoñ meñ nīm-jāñ haiñ ham

ābiyār-e-suḳhan hai apnī zabāñ

lafz o ma.anī ke bāġhbāñ haiñ ham

tū hī tū hai jo ḳhuub ġhaur kareñ

ek dhokā sā darmiyāñ haiñ ham

dāvat-e-teġh ke to qābil haiñ

go ki yak-musht-e-ustuḳhāñ haiñ ham

rañg-e-ruḳh par hamāre, zardī sī

nazar aatī hai, kyā ḳhizāñ haiñ ham

go kiyā ham ko sard piirī ne

par abhī tab.a meñ javāñ haiñ ham

aur bhī ham ko rahne de chande

go tirī tab.a par girāñ haiñ ham

bāġhbāñ ab chaman se jāveñ kahāñ

bulbul-e-kohna āshiyāñ haiñ ham

'mus.hafī' shā.erī rahī hai kahāñ

ab to majlis ke rauza-ḳhvāñ haiñ ham

yaadgar-e-guzishtagan hain hum

KHub dekha to phir kahan hain hum

shama ki tarah bazm-e-giti mein

dagh baiThe hain aur rawan hain hum

rahe jate hain pichhe yaron se

gard-e-dumbaal-e-karwan hain hum

rakh na KHanjar ko hath se qatil

tere kushton mein nim-jaan hain hum

aabiyar-e-suKHan hai apni zaban

lafz o mani ke baghban hain hum

tu hi tu hai jo KHub ghaur karen

ek dhoka sa darmiyan hain hum

dawat-e-tegh ke to qabil hain

go ki yak-musht-e-ustuKHan hain hum

rang-e-ruKH par hamare, zardi si

nazar aati hai, kya KHizan hain hum

go kiya hum ko sard piri ne

par abhi taba mein jawan hain hum

aur bhi hum ko rahne de chande

go teri taba par giran hain hum

baghban ab chaman se jawen kahan

bulbul-e-kohna aashiyan hain hum

'mushafi' shaeri rahi hai kahan

ab to majlis ke rauza-KHwan hain hum