yahan se wapsi ka marhala kitna giran nikla

yahāñ se vāpsī kā marhala kitnā girāñ niklā

bahut kuchh ham ne joḌā aur sab kuchh rā.egāñ niklā

harā thā zaḳhm vālid kā magar ye maañ ko kyā sūjhī

zamīñ pairoñ se niklī thī ki sar se āsmāñ niklā

baḌā nāzuk baḌī ā'sāb-shiknī kā zamāna hai

musalsal koshishoñ ke baa'd muñh se nāgahāñ niklā

mujhe sab dekhte hī rah ga.e kuchh kar nahīñ paa.e

'ajab andāz se maiñ bhī to un ke darmiyāñ niklā

masā.il ek sab ke sab kī zimmedāriyāñ yaksāñ

jo sach pūchho to duniyā ek kunbe kā makāñ niklā

zamīñ par raat din chhoTe baḌe hote hue dekhe

falak par har sitāra vaqt par niklā javāñ niklā

kabhī to rote rote merī ghigghī bandh jaatī hai

zamāna zindagī ke 'aish kā andhā kuaañ niklā

huā majbūr maiñ bhī 'irtizā' āhista chalne par

ki merā har qadam ik bebasī kī dāstāñ niklā

yahan se wapsi ka marhala kitna giran nikla

bahut kuchh hum ne joDa aur sab kuchh raegan nikla

hara tha zaKHm walid ka magar ye man ko kya sujhi

zamin pairon se nikli thi ki sar se aasman nikla

baDa nazuk baDi aa'sab-shikni ka zamana hai

musalsal koshishon ke ba'd munh se nagahan nikla

mujhe sab dekhte hi rah gae kuchh kar nahin pae

'ajab andaz se main bhi to un ke darmiyan nikla

masail ek sab ke sab ki zimmedariyan yaksan

jo sach puchho to duniya ek kunbe ka makan nikla

zamin par raat din chhoTe baDe hote hue dekhe

falak par har sitara waqt par nikla jawan nikla

kabhi to rote rote meri ghigghi bandh jati hai

zamana zindagi ke 'aish ka andha kuan nikla

hua majbur main bhi 'irtiza' aahista chalne par

ki mera har qadam ek bebasi ki dastan nikla