yahi jo nikla jo uljhanon ka dilon ki koi jawab nikla

yahī jo niklā jo uljhanoñ kā diloñ kī koī javāb niklā

hamārī hastī thī ik fasāna fasāna jo thā so ḳhvāb niklā

udhar hai sar-garmī-e-taġhāful idhar hai ik zauq-e-sarfaroshī

vo husn kī ek fasl niklī ye 'ishq kā ik baab niklā

ik aag sī dil meñ lag ga.ī thī dhuāñ sā kuchh rah gayā thā uTh kar

firāq kī raat dil kā ghuT ghuT ke is tarah pech-o-tāb niklā

hamāre haq meñ pa.e-jarāhat ye 'ishq ke haiñ 'ajab karishme

ki dil to pahlū se niklā lekin na dil se vo iztirāb niklā

jo rāz-e-duniyā se be-ḳhabar hai vahī haqīqat meñ bā-ḳhabar hai

rahā jo is tajrabe meñ nākām samjho vo kāmyāb niklā

hazār afsos dīda-e-kor par ki ik baar bhī na dekhā

vo laakh ban ban ke chāñd sūraj falak pe go be-naqāb niklā

sunā hai qaid-e-hayāt se chhuT gayā ġharīb aaj shukr sad-shukr

kashākash-e-ġham se bā’d-e-muddat 'jalīl'-e-ḳhāna-ḳharāb niklā

yahi jo nikla jo uljhanon ka dilon ki koi jawab nikla

hamari hasti thi ek fasana fasana jo tha so KHwab nikla

udhar hai sar-garmi-e-taghaful idhar hai ek zauq-e-sarfaroshi

wo husn ki ek fasl nikli ye 'ishq ka ek bab nikla

ek aag si dil mein lag gai thi dhuan sa kuchh rah gaya tha uTh kar

firaq ki raat dil ka ghuT ghuT ke is tarah pech-o-tab nikla

hamare haq mein pae-jarahat ye 'ishq ke hain 'ajab karishme

ki dil to pahlu se nikla lekin na dil se wo iztirab nikla

jo raaz-e-duniya se be-KHabar hai wahi haqiqat mein ba-KHabar hai

raha jo is tajrabe mein nakaam samjho wo kaamyab nikla

hazar afsos dida-e-kor par ki ek bar bhi na dekha

wo lakh ban ban ke chand suraj falak pe go be-naqab nikla

suna hai qaid-e-hayat se chhuT gaya gharib aaj shukr sad-shukr

kashakash-e-gham se ba’d-e-muddat 'jalil'-e-KHana-KHarab nikla