یہیں چلائی تھیں کل اپنی کشتیاں ہم نے

یہیں چلائی تھیں کل اپنی کشتیاں ہم نے

اسی خرابے میں دی تھیں کبھی اذاں ہم نے

خدا کی بستی میں رہتے ہیں اک زمانے سے

کوئی زمین بنائی نہ آسماں ہم نے

وہ جس کو کہتے ہیں سب ہے رگ گلو سے قریب

تلاش اس کو کیا ہے کہاں کہاں ہم نے

ستارے جڑ دئے پلکوں سے توڑ کر اے دوست

بنا دیا ترے دامن کو آسماں ہم نے

تمہاری یادیں بسا لیں ہیں اپنی آنکھوں میں

تمہارے غم کو ہی سمجھا شریک جاں ہم نے

بہت دنوں سے مقید تھے اپنی آنکھوں میں

جو تم ملے ہو تو دیکھا ہے آسماں ہم نے

تکلفات سے ہم دور ہی رہے فاروقؔ

نہ پھول دیکھے نہ تارے نہ تتلیاں ہم نے