yaqin hai jis pe wahi bad-guman nikalta hai

yaqīñ hai jis pe vahī bad-gumāñ nikaltā hai

mirī zamīn se us kā makāñ nikaltā hai

hamāre shahr meñ hotā hai sāneha lekin

ḳhatā kahāñ kī hai ġhussa kahāñ nikaltā hai

ye aur baat ki vo paak sar-zamīñ hai magar

vahāñ kī ḳhaak se hindostāñ nikaltā hai

mire liye to akelā ḳhudā bahut hai magar

tumhāre vāste saarā jahāñ nikaltā hai

siyāh raat sitāre bujhātī rahtī hai

ye merā ḳhvāb-sitāra kahāñ nikaltā hai

safar hai dhuup samundar kā aur jazīre sā

kahīñ kahīñ pe koī sā.ebāñ nikaltā hai

manā rahā hai vo jashn-e-shabāb maqtal meñ

har ek laash kā chehra javāñ nikaltā hai

tumhāre ghar meñ abhī kitnī raushnī hogī

hamāre ghar se abhī tak dhuāñ nikaltā hai

kahā kisī ne siyah-posh ho gayā 'ḳhurshīd'

sunā kisī ne dam-e-kahkashāñ nikaltā hai

yaqin hai jis pe wahi bad-guman nikalta hai

meri zamin se us ka makan nikalta hai

hamare shahr mein hota hai saneha lekin

KHata kahan ki hai ghussa kahan nikalta hai

ye aur baat ki wo pak sar-zamin hai magar

wahan ki KHak se hindostan nikalta hai

mere liye to akela KHuda bahut hai magar

tumhaare waste sara jahan nikalta hai

siyah raat sitare bujhati rahti hai

ye mera KHwab-sitara kahan nikalta hai

safar hai dhup samundar ka aur jazire sa

kahin kahin pe koi saeban nikalta hai

mana raha hai wo jashn-e-shabab maqtal mein

har ek lash ka chehra jawan nikalta hai

tumhaare ghar mein abhi kitni raushni hogi

hamare ghar se abhi tak dhuan nikalta hai

kaha kisi ne siyah-posh ho gaya 'KHurshid'

suna kisi ne dam-e-kahkashan nikalta hai