yaqin ki had mein hun ya warta-e-guman mein hun

yaqīñ kī had meñ huuñ yā varta-e-gumān meñ huuñ

mujhe ḳhabar hai ki maiñ huuñ par imtihān meñ huuñ

vo par sameT ke ḳhush hai ki pā gayā mujh ko

maiñ zaḳhm khā ke huuñ nāzāñ ki āsmān meñ huuñ

koī to thā ki jo patthar banā gayā chhū kar

mujhe batāo maiñ kis shaḳhs kī amaan meñ huuñ

havā kī aañkh se guzrūñ to ma.arka Thahre

misāl-e-tīr abhī halqa-e-kamān meñ huuñ

huuñ muntazir kisī lams-nigāh kā kab se

maiñ ik kitāb kī sūrat kisī dukān meñ huuñ

badan hai barf magar jal rahā huuñ lakḌī sā

maiñ apne ghar meñ huuñ yā ġhair ke makān meñ huuñ

na kar talāsh ki sāhil nahīñ mirā maskan

maiñ har ghaḌī tirī kashtī ke bādbān meñ huuñ

yaqin ki had mein hun ya warta-e-guman mein hun

mujhe KHabar hai ki main hun par imtihan mein hun

wo par sameT ke KHush hai ki pa gaya mujh ko

main zaKHm kha ke hun nazan ki aasman mein hun

koi to tha ki jo patthar bana gaya chhu kar

mujhe batao main kis shaKHs ki aman mein hun

hawa ki aankh se guzrun to marka Thahre

misal-e-tir abhi halqa-e-kaman mein hun

hun muntazir kisi lams-nigah ka kab se

main ek kitab ki surat kisi dukan mein hun

badan hai barf magar jal raha hun lakDi sa

main apne ghar mein hun ya ghair ke makan mein hun

na kar talash ki sahil nahin mera maskan

main har ghaDi teri kashti ke baadban mein hun