yaqin ko sinchna hai KHwabon ko palna hai

yaqīn ko sīñchnā hai ḳhvāboñ ko pālnā hai

bachā hai thoḌā sā jo asāsa sambhālnā hai

savāl ye hai chhuḌā leñ mas.aloñ se dāman

ki in meñ rah kar hī koī rasta nikālnā hai

jahān-e-saudāgarī meñ dil kā vakīl ban kar

is ahd kī munsifī ko hairat meñ Dālnā hai

jo mujh meñ baiThā uḌātā rahtā hai niiñd merī

mujhe ab us aadmī ko bāhar nikālnā hai

zamīn zaḳhmoñ pe tere marham bhī ham rakheñge

abhī gaḌī sūiyoñ ko tan se nikālnā hai

kisī ko maidān meñ utarnā hai jītnā hai

kisī ko tā-umr sirf sikka uchhālnā hai

ye naav kāġhaz kī jis ne naddī to paar kar lī

kuchh aur sīkhe ab is ko dariyā meñ Dālnā hai

yaqin ko sinchna hai KHwabon ko palna hai

bacha hai thoDa sa jo asasa sambhaalna hai

sawal ye hai chhuDa len masalon se daman

ki in mein rah kar hi koi rasta nikalna hai

jahan-e-saudagari mein dil ka wakil ban kar

is ahd ki munsifi ko hairat mein Dalna hai

jo mujh mein baiTha uData rahta hai nind meri

mujhe ab us aadmi ko bahar nikalna hai

zamin zaKHmon pe tere marham bhi hum rakhenge

abhi gaDi suiyon ko tan se nikalna hai

kisi ko maidan mein utarna hai jitna hai

kisi ko ta-umr sirf sikka uchhaalna hai

ye naw kaghaz ki jis ne naddi to par kar li

kuchh aur sikhe ab is ko dariya mein Dalna hai