ye aag si lagi hai jo sab lala-zar mein

ye aag sī lagī hai jo sab lāla-zār meñ

shāyad jalā kisī kā nasheman bahār meñ

rāh-e-vafā se haT ke ga.e rah-ravān-e-shauq

lekin na farq thā mire sabr-o-qarār meñ

hai muft kī sharāb to phir kuchh na pūchhiye

qaazī ko bhī halāl mile gar udhār meñ

aa.egā ek din to hamārā tumheñ ḳhayāl

ham ne nishāñ banā.e haiñ har regzār meñ

ham ko bhī kuchh milegā 'vasiyya' sila zarūr

guzre haiñ māh-o-sāl isī intizār meñ

ye aag si lagi hai jo sab lala-zar mein

shayad jala kisi ka nasheman bahaar mein

rah-e-wafa se haT ke gae rah-rawan-e-shauq

lekin na farq tha mere sabr-o-qarar mein

hai muft ki sharab to phir kuchh na puchhiye

qazi ko bhi halal mile gar udhaar mein

aaega ek din to hamara tumhein KHayal

hum ne nishan banae hain har regzar mein

hum ko bhi kuchh milega 'wasiyya' sila zarur

guzre hain mah-o-sal isi intizar mein