ye aur baat ki lahja udas rakhte hain

ye aur baat ki lahja udaas rakhte haiñ

ḳhizāñ ke giit bhī apnī miThās rakhte haiñ

kaheñ to kyā kaheñ ham un kī sāda-lauhī ko

jo qātiloñ se tarahhum kī aas rakhte haiñ

kisī ke sāmne phailā.īñ kis liye dāman

tumhāre dard kī daulat jo paas rakhte haiñ

unheñ hayāt kī tohmat na do abas yaaro

jo apnā jism na apnā libās rakhte haiñ

qarīb-e-gul-badnāñ rah chuke haiñ dīvāne

ye ḳhaar vo haiñ jo phūloñ kī baas rakhte haiñ

kahāñ bhigo.e koī apne ḳhushk hoñToñ ko

ye daur vo hai ki dariyā bhī pyaas rakhte haiñ

ḳhudā kā shukr adā kiije ḳhush-nasībī par

'hafīz' aap dil-e-ġham-shanās rakhte haiñ

ye aur baat ki lahja udas rakhte hain

KHizan ke git bhi apni miThas rakhte hain

kahen to kya kahen hum un ki sada-lauhi ko

jo qatilon se tarahhum ki aas rakhte hain

kisi ke samne phailain kis liye daman

tumhaare dard ki daulat jo pas rakhte hain

unhen hayat ki tohmat na do abas yaro

jo apna jism na apna libas rakhte hain

qarib-e-gul-badnan rah chuke hain diwane

ye KHar wo hain jo phulon ki bas rakhte hain

kahan bhigoe koi apne KHushk honTon ko

ye daur wo hai ki dariya bhi pyas rakhte hain

KHuda ka shukr ada kije KHush-nasibi par

'hafiz' aap dil-e-gham-shanas rakhte hain