ye baat sach hai ki main surat-e-habab raha

ye baat sach hai ki maiñ sūrat-e-habāb rahā

hai ye bhī sach mirī muTThī meñ āftāb rahā

jo dūsre kī ḳhushī ke liye jiyā ai dost

tire jahāñ meñ vo insān kāmyāb rahā

havā ne ret ko tūdoñ kī shakl de dī thī

magar jab āñdhiyāñ aa.iiñ to kyā hisāb rahā

hazār kāvish-o-koshish pe bhī kabhī na khule

vo dost jin ke liye maiñ khulī kitāb rahā

tire shabāb ne luuTe hamāre sabr-o-sukūñ

hamārī jaan kā levā tirā shabāb rahā

koī umiid bhī puurī na ho sakī 'manzil'

jo ḳhvāb dekhā thā maiñ ne vo sirf ḳhvāb rahā

ye baat sach hai ki main surat-e-habab raha

hai ye bhi sach meri muTThi mein aaftab raha

jo dusre ki KHushi ke liye jiya ai dost

tere jahan mein wo insan kaamyab raha

hawa ne ret ko tudon ki shakl de di thi

magar jab aandhiyan aain to kya hisab raha

hazar kawish-o-koshish pe bhi kabhi na khule

wo dost jin ke liye main khuli kitab raha

tere shabab ne luTe hamare sabr-o-sukun

hamari jaan ka lewa tera shabab raha

koi umid bhi puri na ho saki 'manzil'

jo KHwab dekha tha main ne wo sirf KHwab raha