ye baat unki tabiat pe bar guzri hai

ye baat un kī tabī'at pe baar guzrī hai

ki zindagī mirī kyoñ ḳhush-gavār guzrī hai

ḳhushī se zindagī-e-ġham guzārne vaalo

ḳhizāñ tumhāre hī dam se bahār guzrī hai

nahīñ uThā.e haiñ apnoñ ke bhī kabhī ehsāñ

hazār shukr ki begāna-vār guzrī hai

dil-e-ġharīb ko ghar kā huā na chain nasīb

ise to 'umr sar-e-rahguzār guzrī hai

nasheman apnā hai phir barq-o-bād se sarshār

na.ī bahār bhī kyā sāzgār guzrī hai

koī masarrat-e-lazzat mujhe na dard kā ġham

mirī to ziist hī mastāna-vār guzrī hai

ye sādgī to zarā dekhiye vo pūchhte haiñ

ki zindagī tirī kyoñ be-qarār guzrī hai

maiñ apne dā’vā-e-ulfat se aaj baaz aayā

guzar ga.ī hai magar sharmsār guzrī hai

ye baat un ki tabi'at pe bar guzri hai

ki zindagi meri kyon KHush-gawar guzri hai

KHushi se zindagi-e-gham guzarne walo

KHizan tumhaare hi dam se bahaar guzri hai

nahin uThae hain apnon ke bhi kabhi ehsan

hazar shukr ki begana-war guzri hai

dil-e-gharib ko ghar ka hua na chain nasib

ise to 'umr sar-e-rahguzar guzri hai

nasheman apna hai phir barq-o-baad se sarshaar

nai bahaar bhi kya sazgar guzri hai

koi masarrat-e-lazzat mujhe na dard ka gham

meri to zist hi mastana-war guzri hai

ye sadgi to zara dekhiye wo puchhte hain

ki zindagi teri kyon be-qarar guzri hai

main apne da’wa-e-ulfat se aaj baz aaya

guzar gai hai magar sharmsar guzri hai