ye baja sahi mujhe aapne meri manzilon ka pata diya

ye bajā sahī mujhe aap ne mirī manziloñ kā pata diyā

mire saath saath na chal sake mirā hausla to baḌhā diyā

kabhī soz-e-'ishq se shām-e-ġham mire jism-o-jāñ jo sulag uThe

tire ġham kī 'umr darāz ho inheñ āñsuoñ se bujhā diyā

shab-e-ġham kā haal na pūchhiye yahī kashmakash rahī raat bhar

kabhī be-ḳhudī ne sulā diyā kabhī bekalī ne jagā diyā

na yaqīn-o-'azm ke naqsh the na kahīñ umang kā rang thā

thī hayāt saada varaq varaq jise hādsoñ ne sajā diyā

na huā hai ḳhatm na ho kabhī ye fasāna-e-ġham-e-'āshiqī

jo kabhī kahīñ se sunā diyā to kabhī kahīñ se sunā diyā

baḌī dardnāk hai ham-nashīñ mire āshiyāñ kī ye dāstāñ

jise bijliyāñ na jalā sakīñ use bāġhbāñ ne jalā diyā

mujhe ai 'aqīl' ye fikr thī ki kaTegī kaise shab-e-alam

magar un kī yaad kā shukriya ki thapak thapak ke sulā diyā

ye baja sahi mujhe aap ne meri manzilon ka pata diya

mere sath sath na chal sake mera hausla to baDha diya

kabhi soz-e-'ishq se sham-e-gham mere jism-o-jaan jo sulag uThe

tere gham ki 'umr daraaz ho inhen aansuon se bujha diya

shab-e-gham ka haal na puchhiye yahi kashmakash rahi raat bhar

kabhi be-KHudi ne sula diya kabhi bekali ne jaga diya

na yaqin-o-'azm ke naqsh the na kahin umang ka rang tha

thi hayat sada waraq waraq jise hadson ne saja diya

na hua hai KHatm na ho kabhi ye fasana-e-gham-e-'ashiqi

jo kabhi kahin se suna diya to kabhi kahin se suna diya

baDi dardnak hai ham-nashin mere aashiyan ki ye dastan

jise bijliyan na jala sakin use baghban ne jala diya

mujhe ai 'aqil' ye fikr thi ki kaTegi kaise shab-e-alam

magar un ki yaad ka shukriya ki thapak thapak ke sula diya