ye dekh mere naqsh-e-kaf-e-pa mere aage

ye dekh mire naqsh-e-kaf-e-pā mire aage

aage bhī kahāñ jaatā hai rasta mire aage

ai tishna-labī tū ne kahāñ lā ke Duboyā

is baar to dariyā bhī nahīñ thā mire aage

aise nahīñ mānūñgā maiñ hastī kā tavāzun

taqtī.a kiyā jaa.e ye misra mire aage

ai qāmat-e-dil-dār-e-guzisthā kī muāfī

pahle koī me.aar nahīñ thā mire aage

kyūñkar suḳhan āġhāz kiyā jaa.e ki vo aañkh

lā rakhtī hai ajdād kā likkhā mire aage

hairat hai ki detī haiñ mujhe ta.ana-e-vahshat

tartīb se rakkhī huī ashyā mire aage

maiñ jāntā huuñ us ke sabhī bhed sabhī bhaav

duniyā ne kabhī raqs kiyā thā mire aage

maiñ ishq ke ādāb zarā siikh luuñ pahle

baiThegī adab se yahī duniyā mire aage

ye dekh mere naqsh-e-kaf-e-pa mere aage

aage bhi kahan jata hai rasta mere aage

ai tishna-labi tu ne kahan la ke Duboya

is bar to dariya bhi nahin tha mere aage

aise nahin manunga main hasti ka tawazun

taqtia kiya jae ye misra mere aage

ai qamat-e-dil-dar-e-guzistha ki muafi

pahle koi mear nahin tha mere aage

kyunkar suKHan aaghaz kiya jae ki wo aankh

la rakhti hai ajdad ka likkha mere aage

hairat hai ki deti hain mujhe tana-e-wahshat

tartib se rakkhi hui ashya mere aage

main jaanta hun us ke sabhi bhed sabhi bhaw

duniya ne kabhi raqs kiya tha mere aage

main ishq ke aadab zara sikh lun pahle

baiThegi adab se yahi duniya mere aage