ye duniya ek gahra sach hai

ye duniyā ik gahrā sach hai

lekin phir bhī aadhā sach hai

tum jhūTe nā maiñ jhūTā huuñ

sab kā apnā apnā sach hai

kuchh bāteñ us kī mīThī haiñ

lekin baaqī saarā sach hai

bhūke kā īmān hai roTī

majnūñ kī bas lailā sach hai

haañ tāqat kā zor bahut hai

par āḳhir meñ bachtā sach hai

daar pe mujh ko le jā be-shak

maiñ ne phir bhī kahnā sach hai

rotī kyoñ ho 'ishq hamārā

achchhā baabā achchhā sach hai

us kī ḳhātir maiñ sab kuchh huuñ

mujh ko sab se pyārā sach hai

jhuuT ke pair nahīñ hote haiñ

aur muqābil andhā sach hai

baat to terī sach hai 'sayyad'

lekin behad kaḌvā sach hai

ye duniya ek gahra sach hai

lekin phir bhi aadha sach hai

tum jhuTe na main jhuTa hun

sab ka apna apna sach hai

kuchh baaten us ki miThi hain

lekin baqi sara sach hai

bhuke ka iman hai roTi

majnun ki bas laila sach hai

han taqat ka zor bahut hai

par aaKHir mein bachta sach hai

dar pe mujh ko le ja be-shak

main ne phir bhi kahna sach hai

roti kyon ho 'ishq hamara

achchha baba achchha sach hai

us ki KHatir main sab kuchh hun

mujh ko sab se pyara sach hai

jhuT ke pair nahin hote hain

aur muqabil andha sach hai

baat to teri sach hai 'sayyad'

lekin behad kaDwa sach hai