ye haal hai mere dil ka teri nazar ke qarib

ye haal hai mire dil kā tirī nazar ke qarīb

ho jis tarah se nasheman koī sharar ke qarīb

ziyā hai dil ke sulagne kī bām-o-dar ke qarīb

shab-e-firāq khiñch aa.ī hai yā sahar ke qarīb

mahakte zaḳhm idhar haiñ dil-o-jigar ke qarīb

udhar gulāb hai bālīñ pe zulf-o-sar ke qarīb

hai dhuup gardish-e-daurāñ kī tez kuchh aisī

ki apnā saaya bhī aatā nahīñ hai Dar ke qarīb

use kahīñ lab-o-ruḳhsār mil ke luuT na leñ

hayāt aa.ī hai kyoñ shabnam-o-sharar ke qarīb

hinā.ī haath uThe the salām karne ko

hai aañch un kī hamāre dil-o-jigar ke qarīb

galī galī meñ vo phirtā hai aaj āvāra

kabhī jo aa ke basā thā tumhāre ghar ke qarīb

na jaane kab koī is rahguzar pe aa nikle

jalā.e baiThe haiñ ik sham.a rahguzar ke qarīb

koī to baat hai bigḌe hue jo tevar haiñ

kahāñ se aa ga.e patthar ye shīshagar ke qarīb

vo ham nahīñ ki jo bhāgeñ bahār ke pīchhe

bahār aatī hai chal kar hamāre ghar ke qarīb

ye haal hai mere dil ka teri nazar ke qarib

ho jis tarah se nasheman koi sharar ke qarib

ziya hai dil ke sulagne ki baam-o-dar ke qarib

shab-e-firaq khinch aai hai ya sahar ke qarib

mahakte zaKHm idhar hain dil-o-jigar ke qarib

udhar gulab hai baalin pe zulf-o-sar ke qarib

hai dhup gardish-e-dauran ki tez kuchh aisi

ki apna saya bhi aata nahin hai Dar ke qarib

use kahin lab-o-ruKHsar mil ke luT na len

hayat aai hai kyon shabnam-o-sharar ke qarib

hinai hath uThe the salam karne ko

hai aanch un ki hamare dil-o-jigar ke qarib

gali gali mein wo phirta hai aaj aawara

kabhi jo aa ke basa tha tumhaare ghar ke qarib

na jaane kab koi is rahguzar pe aa nikle

jalae baiThe hain ek shama rahguzar ke qarib

koi to baat hai bigDe hue jo tewar hain

kahan se aa gae patthar ye shishagar ke qarib

wo hum nahin ki jo bhagen bahaar ke pichhe

bahaar aati hai chal kar hamare ghar ke qarib