ye hai mai-kada yahan rind hain yahan sab ka saqi imam hai

ye hai mai-kada yahāñ rind haiñ yahāñ sab kā saaqī imaam hai

ye haram nahīñ hai ai shaiḳh jī yahāñ pārsā.ī harām hai

jo zarā sī pī ke bahak gayā use mai-kade se nikāl do

yahāñ tang-nazar kā guzar nahīñ yahāñ ahl-e-zarf kā kaam hai

koī mast hai koī tishna-lab to kisī ke haath meñ jaam hai

magar is pe koī kare bhī kyā ye to mai-kade kā nizām hai

ye janāb-e-shaiḳh kā falsafa hai 'ajīb saare jahān se

jo vahāñ piyo to halāl hai jo yahāñ piyo to harām hai

tujhe apne husn kā vāsta mere shauq-e-dīd pa rahm khā

zarā muskurā ke naqāb uThā ki nazar ko shauq-e-salām hai

na sunnā to huur o qusūr kī ye hikāyateñ mujhe vā'izā

koī baat kar dar-e-yār kī dar-e-yār hī se to kaam hai

na to e'tikāf se kuchh ġharaz na savāb-o-zuhd se vāsta

tirī diid aisī namāz hai na sujūd hai na qayām hai

ye durust ki 'aib hai mai-kashī ye ba-jā ki baada harām hai

magar ab savāl ye aa paḌā ki tumhāre haath meñ jaam hai

jo uThī to sub.h-e-davām thī jo jhukī to shaam hī shaam thī

tirī chashm-e-mast meñ sāqiyā mirī zindagī kā nizām hai

mirā farz hai ki paḌā rahūñ tirī bārgāh meñ sāqiyā

koī tishna-lab hai ki sair hai yahī dekhnā tirā kaam hai

isī kā.enāt meñ ai 'jigar' koī inqalāb uThegā phir

ki buland ho ke bhī aadmī abhī ḳhvāhishoñ kā ġhulām hai

ye hai mai-kada yahan rind hain yahan sab ka saqi imam hai

ye haram nahin hai ai shaiKH ji yahan parsai haram hai

jo zara si pi ke bahak gaya use mai-kade se nikal do

yahan tang-nazar ka guzar nahin yahan ahl-e-zarf ka kaam hai

koi mast hai koi tishna-lab to kisi ke hath mein jam hai

magar is pe koi kare bhi kya ye to mai-kade ka nizam hai

ye janab-e-shaiKH ka falsafa hai 'ajib sare jahan se

jo wahan piyo to halal hai jo yahan piyo to haram hai

tujhe apne husn ka wasta mere shauq-e-did pa rahm kha

zara muskura ke naqab uTha ki nazar ko shauq-e-salam hai

na sunna to hur o qusur ki ye hikayaten mujhe wa'iza

koi baat kar dar-e-yar ki dar-e-yar hi se to kaam hai

na to e'tikaf se kuchh gharaz na sawab-o-zuhd se wasta

teri did aisi namaz hai na sujud hai na qayam hai

ye durust ki 'aib hai mai-kashi ye ba-ja ki baada haram hai

magar ab sawal ye aa paDa ki tumhaare hath mein jam hai

jo uThi to subh-e-dawam thi jo jhuki to sham hi sham thi

teri chashm-e-mast mein saqiya meri zindagi ka nizam hai

mera farz hai ki paDa rahun teri bargah mein saqiya

koi tishna-lab hai ki sair hai yahi dekhna tera kaam hai

isi kaenat mein ai 'jigar' koi inqalab uThega phir

ki buland ho ke bhi aadmi abhi KHwahishon ka ghulam hai