ye hasraton ki meri KHak se numu kya hai

ye hasratoñ kī mirī ḳhaak se numū kyā hai

tire baġhair ye duniyā-e-rang-o-bū kyā hai

tū yuuñ bhī saath mire jāñ-ba-lab judā.ī meñ

vagarna ye jiye jaane kī aarzū kyā hai

tumhārī yaad se baḌh kar kareñ ibādat kyā

bahe jab aañkh se ḳhud hī to phir vuzū kyā hai

sañbhal ke yuuñ vo na.e ham-safar ke saath chalā

kabhī na us ko batāyā ki justujū kyā hai

maiñ aaj apne masīhā se kaT ke aaya huuñ

mirā ilaaj batā mere chāra-jū kyā hai

lahū to vo ki bahe jab to naqsh-e-yār bane

na apnā rang jamā.e to phir lahū kyā hai

ye hasraton ki meri KHak se numu kya hai

tere baghair ye duniya-e-rang-o-bu kya hai

tu yun bhi sath mere jaan-ba-lab judai mein

wagarna ye jiye jaane ki aarzu kya hai

tumhaari yaad se baDh kar karen ibaadat kya

bahe jab aankh se KHud hi to phir wuzu kya hai

sanbhal ke yun wo nae ham-safar ke sath chala

kabhi na us ko bataya ki justuju kya hai

main aaj apne masiha se kaT ke aaya hun

mera ilaj bata mere chaara-ju kya hai

lahu to wo ki bahe jab to naqsh-e-yar bane

na apna rang jamae to phir lahu kya hai