ye husn hai jharnon mein na hai baad-e-chaman mein

ye husn hai jharnoñ meñ na hai bād-e-chaman meñ

jis husn se hai chāñd ravāñ nīl-gagan meñ

ai kaash kabhī qaid bhī hotā mire fan meñ

vo naġhma-e-dil-kash ki hai āvāra pavan meñ

uTh kar tirī mahfil se ajab haal huā hai

dil apnā bahaltā hai na bastī meñ na ban meñ

ik husn-e-mujassam kā vo pairāhan-e-rañgīñ

Dhal jaa.e dhanak jaise kisī chandr-kiran meñ

ai nik.hat-e-āvāra zarā tū hī batā de

hai tāzgī phūloñ meñ ki us shoḳh ke tan meñ

dekhā thā kahāñ us ko hameñ yaad nahīñ hai

tasvīr sī phirtī hai magar ab bhī nayan meñ

is daur meñ āsāñ to na thī aisī ġhazal bhī

kuchh fan abhī zinda hai magar mulk-e-dakan meñ

ye husn hai jharnon mein na hai baad-e-chaman mein

jis husn se hai chand rawan nil-gagan mein

ai kash kabhi qaid bhi hota mere fan mein

wo naghma-e-dil-kash ki hai aawara pawan mein

uTh kar teri mahfil se ajab haal hua hai

dil apna bahalta hai na basti mein na ban mein

ek husn-e-mujassam ka wo pairahan-e-rangin

Dhal jae dhanak jaise kisi chandr-kiran mein

ai nikhat-e-awara zara tu hi bata de

hai tazgi phulon mein ki us shoKH ke tan mein

dekha tha kahan us ko hamein yaad nahin hai

taswir si phirti hai magar ab bhi nayan mein

is daur mein aasan to na thi aisi ghazal bhi

kuchh fan abhi zinda hai magar mulk-e-dakan mein