ye jo meri lai aur lafzon ke rangin tane-bane hain

ye jo mirī lai aur lafzoñ ke rañgīñ tāne-bāne haiñ

sunñe vāloñ ġhaur na karnā saare raag purāne haiñ

sunñe vaalo ġhaur na karnā varna khul hī jā.eñge

kitne ḳhālī bhed hamāre jo kab se afsāne haiñ

sunñe vāloñ ġhaur na karnā varna pata chal jā.egā

ham ne jitne baaġh sajā.e vo ab tak vīrāne haiñ

sunñe vaalo ġhaur na karnā varna saaf samajh loge

ham ne jitne naam liye the aaj bhī sab anjāne haiñ

sunñe vaalo ġhaur na karnā varna ḳhafā ho jāoge

jin ko ham ne dost kahā hai ham un se begāne haiñ

sunñe vaalo ġhaur na karnā varna hameñ Thukrā doge

ham andar se saḳht kamīne bāhar se dīvāne haiñ

sunñe vaalo ġhaur na karnā ham be-sar ho jā.eñge

jab tak tum sar dhunte rahoge saare giit suhāne haiñ

sunñe vaalo ġhaur na karnā varna ham ḳhud kah deñge

ham ab sher nahīñ kah sakte ye sab sher bahāne haiñ

ye jo meri lai aur lafzon ke rangin tane-bane hain

sunne walon ghaur na karna sare rag purane hain

sunne walo ghaur na karna warna khul hi jaenge

kitne KHali bhed hamare jo kab se afsane hain

sunne walon ghaur na karna warna pata chal jaega

hum ne jitne bagh sajae wo ab tak virane hain

sunne walo ghaur na karna warna saf samajh loge

hum ne jitne nam liye the aaj bhi sab anjaane hain

sunne walo ghaur na karna warna KHafa ho jaoge

jin ko hum ne dost kaha hai hum un se begane hain

sunne walo ghaur na karna warna hamein Thukra doge

hum andar se saKHt kamine bahar se diwane hain

sunne walo ghaur na karna hum be-sar ho jaenge

jab tak tum sar dhunte rahoge sare git suhane hain

sunne walo ghaur na karna warna hum KHud kah denge

hum ab sher nahin kah sakte ye sab sher bahane hain