ye jo nasha hai ye jo asar hai KHumariyan bhi hai thoDi thoDi

ye jo nasha hai ye jo asar hai ḳhumāriyāñ bhī hai thoḌī thoḌī

sharāb tere laboñ se goyā chhalaktī rahtī hai thoḌī thoḌī

sila mohabbat kā tum samajh lo vafā ke badle vafā nahīñ haiñ

burā-bhalā par use na kahnā kuchh apnī ġhalatī hai thoḌī thoḌī

tumhīñ shikāyat karoge merī tumhī to mere sifārshī the

gila nahīñ maiñ karūñgā lekin ye baat chubhtī hai thoḌī thoḌī

koī ishāra ḳhudārā kar do kahīñ taḌap kar maiñ mar na jā.ūñ

mujhe sharārat tirī ijāzat mile to karnī hai thoḌī thoḌī

hamāre dozaḳh meñ tum jaloge tumhāre dozaḳh meñ ham jaleñge

yuuñ ḳhaak ḳhud ko kareñge dono balā ki mastī hai thoḌī thoḌī

vahī hai sub.h aur vahī hai shāmeñ nayā to kuchh bhī nayā nahīñ hai

tū gar nahīñ hai to kuchh nahīñ bas ġham-e-rasā.ī hai thoḌī thoḌī

kabhī maiñ tujh ko hī bhuul jā.ūñ yā aisā ho tujh ko yaad aa.uuñ

qayāmateñ bas ḳhudā hī jaane jo mujh pe guzrī hai thoḌī thoḌī

pilā.ī us ne yuuñ be-dilī se huā na kuchh bhī asar ai 'sādiq'

harām hai mai-kashī haañ lekin mujhe to piinī hai thoḌī thoḌī

ye jo nasha hai ye jo asar hai KHumariyan bhi hai thoDi thoDi

sharab tere labon se goya chhalakti rahti hai thoDi thoDi

sila mohabbat ka tum samajh lo wafa ke badle wafa nahin hain

bura-bhala par use na kahna kuchh apni ghalati hai thoDi thoDi

tumhin shikayat karoge meri tumhi to mere sifarshi the

gila nahin main karunga lekin ye baat chubhti hai thoDi thoDi

koi ishaara KHudara kar do kahin taDap kar main mar na jaun

mujhe shararat teri ijazat mile to karni hai thoDi thoDi

hamare dozaKH mein tum jaloge tumhaare dozaKH mein hum jalenge

yun KHak KHud ko karenge dono bala ki masti hai thoDi thoDi

wahi hai subh aur wahi hai shamen naya to kuchh bhi naya nahin hai

tu gar nahin hai to kuchh nahin bas gham-e-rasai hai thoDi thoDi

kabhi main tujh ko hi bhul jaun ya aisa ho tujh ko yaad aaun

qayamaten bas KHuda hi jaane jo mujh pe guzri hai thoDi thoDi

pilai us ne yun be-dili se hua na kuchh bhi asar ai 'sadiq'

haram hai mai-kashi han lekin mujhe to pini hai thoDi thoDi