ye jo rasta hai ye zanjir-e-musalsal to nahin

ye jo rasta hai ye zanjīr-e-musalsal to nahīñ

us ke aage mirī hairānī kā jangal to nahīñ

tauq gardan kī ḳharāshoñ ne jagā kar pūchhā

bol paañv tire zanjīr se ghāyal to nahīñ

ai falak-zād batā kyā hai haqīqat terī

chāñd hai tū koī uḌtā huā bādal to nahīñ

ye jo sāvan meñ yahāñ aatī haiñ pyāsī kūñjeñ

merī āñkhoñ meñ kisī hijr kī daldal to nahīñ

sarsarāhaT tirī ḳhushbū kī kabhī pūchhtī hai

jism maḳhmal hai tirā sāya-e-maḳhmal to nahīñ

zard pattoñ kī sisaktī huī tanhā.ī par

ai mire 'ishq kī devī tirā āñchal to nahīñ

tere qadmoñ ke nishāñ se maiñ uThā laayā ise

ye kisī yaad kī khoī huī paa.el to nahīñ

tū ne dekhā hai 'shafaq' jhāñk ke un meñ ka.ī baar

bol un āñkhoñ meñ mire ḳhvāb kā kājal to nahīñ

kyoñ ulajhtā hai in ehsān-farāmoshoñ se

o 'shafaq' kyā huā hai yaar tū pāgal to nahīñ

ye jo rasta hai ye zanjir-e-musalsal to nahin

us ke aage meri hairani ka jangal to nahin

tauq gardan ki KHarashon ne jaga kar puchha

bol panw tere zanjir se ghayal to nahin

ai falak-zad bata kya hai haqiqat teri

chand hai tu koi uDta hua baadal to nahin

ye jo sawan mein yahan aati hain pyasi kunjen

meri aankhon mein kisi hijr ki daldal to nahin

sarsarahaT teri KHushbu ki kabhi puchhti hai

jism maKHmal hai tera saya-e-maKHmal to nahin

zard patton ki sisakti hui tanhai par

ai mere 'ishq ki dewi tera aanchal to nahin

tere qadmon ke nishan se main uTha laya ise

ye kisi yaad ki khoi hui pael to nahin

tu ne dekha hai 'shafaq' jhank ke un mein kai bar

bol un aankhon mein mere KHwab ka kajal to nahin

kyon ulajhta hai in ehsan-faramoshon se

o 'shafaq' kya hua hai yar tu pagal to nahin