ye kar-e-be-samran mujhse hone wala nahin

ye kār-e-be-samrāñ mujh se hone vaalā nahīñ

maiñ zindagī ko bahut der Dhone vaalā nahīñ

maiñ sat.h-e-āb pe ik tairtā huā lāsha

mujhe koī bhī samundar Dubone vaalā nahīñ

baḌe jatan se milā hai ye apnā aap mujhe

maiñ ab kisī ke liye ḳhud ko khone vaalā nahīñ

fasīl-e-shahr tirā āḳhirī muhāfiz huuñ

ye shahr jaage na jaage maiñ sone vaalā nahīñ

vo ek tū ki tire ġham meñ ik jahāñ ro.e

vo ek maiñ ki mirā koī rone vaalā nahīñ

kisī ko phuul na de pā.ūñ maiñ agar 'shahbāz'

kisī kī ruuh meñ kāñTe chubhone vaalā nahīñ

ye kar-e-be-samran mujh se hone wala nahin

main zindagi ko bahut der Dhone wala nahin

main sath-e-ab pe ek tairta hua lasha

mujhe koi bhi samundar Dubone wala nahin

baDe jatan se mila hai ye apna aap mujhe

main ab kisi ke liye KHud ko khone wala nahin

fasil-e-shahr tera aaKHiri muhafiz hun

ye shahr jage na jage main sone wala nahin

wo ek tu ki tere gham mein ek jahan roe

wo ek main ki mera koi rone wala nahin

kisi ko phul na de paun main agar 'shahbaz'

kisi ki ruh mein kanTe chubhone wala nahin