ye kaisa kar-e-duniya ho raha hai

ye kaisā kār-e-duniyā ho rahā hai

lahū insāñ kā sastā ho rahā hai

zarā hālāt kyā badle hamāre

jo apnā thā parāyā ho rahā hai

diloñ kā mail baḌhtā jā rahā hai

bashar andar se kaalā ho rahā hai

ghaTā.eñ ḳhushk hotī jā rahī haiñ

jo dariyā thā vo sahrā ho rahā hai

yahī hotā rahā hai ham se aksar

hamāre saath jaisā ho rahā hai

qadam paḌne lage haiñ sab ke ulTe

har ik rasta hī TeḌhā ho rahā hai

'nabīl'-ahmad kabhī dekhā hai tum ne

bashar kitnā akelā ho rahā hai

ye kaisa kar-e-duniya ho raha hai

lahu insan ka sasta ho raha hai

zara haalat kya badle hamare

jo apna tha paraya ho raha hai

dilon ka mail baDhta ja raha hai

bashar andar se kala ho raha hai

ghaTaen KHushk hoti ja rahi hain

jo dariya tha wo sahra ho raha hai

yahi hota raha hai hum se aksar

hamare sath jaisa ho raha hai

qadam paDne lage hain sab ke ulTe

har ek rasta hi TeDha ho raha hai

'nabil'-ahmad kabhi dekha hai tum ne

bashar kitna akela ho raha hai