ye kaise numu ke silsile hain

ye kaise numū ke silsile haiñ

shāḳhoñ pe gulāb jal-bujhe haiñ

phailī hai sitam kī aag harsū

har samt alaav jal rahe haiñ

har aañkh savāl kar rahī hai

har dil meñ hazār vasvase haiñ

barsī haiñ balā.eñ āsmāñ se

dhartī pe azaab ug rahe haiñ

mahfūz nahīñ panāh-gāheñ

kyā aql-e-rasā ke mo.ajize haiñ

bāzār lahū kī vahshatoñ ke

tahzīb ke naam par saje haiñ

ġhairoñ pe hai inhisār apnā

socheñ bhī udhār māñgte haiñ

sūraj bhī hai dastaras meñ lekin

ham raushnī ko taras ga.e haiñ

kyā jāniye ahd-e-nau kab aa.e

ab tak to purāne silsile haiñ

ye kaise numu ke silsile hain

shaKHon pe gulab jal-bujhe hain

phaili hai sitam ki aag harsu

har samt alaw jal rahe hain

har aankh sawal kar rahi hai

har dil mein hazar waswase hain

barsi hain balaen aasman se

dharti pe azab ug rahe hain

mahfuz nahin panah-gahen

kya aql-e-rasa ke moajize hain

bazar lahu ki wahshaton ke

tahzib ke nam par saje hain

ghairon pe hai inhisar apna

sochen bhi udhaar mangte hain

suraj bhi hai dastaras mein lekin

hum raushni ko taras gae hain

kya jaaniye ahd-e-nau kab aae

ab tak to purane silsile hain