ye kaisi bebasi hai KHud ko khona chahta hun main

ye kaisī bebasī hai ḳhud ko khonā chāhtā huuñ maiñ

ye sab jaise haiñ bas vaisā hī honā chāhtā huuñ maiñ

havas paane kī hai kuchh aur na khonā chāhtā huuñ maiñ

mohabbat meñ tirī mash.hūr honā chāhtā huuñ maiñ

bachāyā laakh phir bhī jism jhūTā ho gayā merā

tirī ḳhātir ise zamzam se dhonā chāhtā huuñ maiñ

sar-e-dariyā-e-tan sair-o-safar maqsad nahīñ merā

zarā bas haath paanī meñ bhigonā chāhtā huuñ maiñ

tumhārā husn to āb-e-ravāñ kā hukm rakhtā hai

burā kyā hai gar us meñ haath dhonā chāhtā huuñ maiñ

bas itnī baat par mujh se ḳhafā haiñ gulsitāñ vaale

guloñ meñ ik na.ī ḳhushbū samonā chāhtā huuñ maiñ

jo Duubā to ye duniyā bhī salāmat rah nahīñ saktī

so apne saath is ko bhī Dubonā chāhtā huuñ maiñ

suḳhan kī rā.egānī mujh se ab dekhī nahīñ jaatī

mire maulā bas ab ḳhāmosh honā chāhtā huuñ maiñ

maiñ ḳhā.if huuñ ma.āl-e-ārzū se is qadar 'najmī'

jise paayā nahīñ us ko bhī khonā chāhtā huuñ maiñ

ye kaisi bebasi hai KHud ko khona chahta hun main

ye sab jaise hain bas waisa hi hona chahta hun main

hawas pane ki hai kuchh aur na khona chahta hun main

mohabbat mein teri mashhur hona chahta hun main

bachaya lakh phir bhi jism jhuTa ho gaya mera

teri KHatir ise zamzam se dhona chahta hun main

sar-e-dariya-e-tan sair-o-safar maqsad nahin mera

zara bas hath pani mein bhigona chahta hun main

tumhaara husn to aab-e-rawan ka hukm rakhta hai

bura kya hai gar us mein hath dhona chahta hun main

bas itni baat par mujh se KHafa hain gulsitan wale

gulon mein ek nai KHushbu samona chahta hun main

jo Duba to ye duniya bhi salamat rah nahin sakti

so apne sath is ko bhi Dubona chahta hun main

suKHan ki raegani mujh se ab dekhi nahin jati

mere maula bas ab KHamosh hona chahta hun main

main KHaif hun maal-e-arzu se is qadar 'najmi'

jise paya nahin us ko bhi khona chahta hun main